انت عندك العقلية الثابتة ولا عقلية النمو؟
واحدة من أهم العناصر اللي بتتحكم في تقدمك ونجاحك هي عقليتك your mindset، ودي أهمّ من تعليمك وعلاقاتك وفلوسك وكل إمكانياتك؛ لأن بدون عقلية مبنية صح، إنت مش هتوصل لأي حاجة حتى لو معاك كل حاجة.
.
طيب عقليتي المفروض تكون مبنية إزاي
عشان أتقدم وأنجح في حياتي؟
.
بص يا سيدي: العقليات نوعين؛
.
نوع ثابت ونوع بينمو أو مؤمن بالنمو: fixed mindset vs growth mindset.
.
🔴 العقلية الثابتة بتبقى شايفة إن الواقع اللي هي فيه خلاص أمر مفروغ منه، وغير قابل للتغيير إلا بمعجزة، أو بمعنى أصح من الخارج (يعني لازم الظروف تتغير عشان أنا أتغيّر).
.
🟢 في حين إن عقلية النمو شايفة إن الواقع اللي هي عايشاه قابل للتغيير حتى لو الظروف ما اتغيرتش، وحتى لو الإمكانيات محدودة.
.
🔴 العقلية الثابتة: كثيرة الاعتراض، كثيرة المقاومة، كثيرة الجدل، لا تقبل النقد، ترى أن المشكلة دائمًا ليست فيها، وإذا عُرض عليها أي حلّ تبحث فيه عن مشكلة بدلًا من أن تبحث عن حلّ للمشكلة.
.
🟢 بينما عقلية النمو بيفكر بشكل إيجابي، وبيفكر في نفسه الأول وإيه دوره في حل المشكلة قبل ما يفكر بلوم الآخرين، يتقبّل النقد ويرى إنه فرصة للتحسين، وبيسعى لإيجاد حلول كلما ظهرت له مشكلة، وبيحاول مع نفسه بكل الطرق قبل ما يوصل لمحطة إنه «مش عارف»، ولما بيوصل للمحطة دي مش بيتكسف يسأل.
.
🔴 العقلية الثابتة: بتخاف تخرج برّا الـcomfort zone، ومش بتحب تدخل في حاجة جديدة. وأول احتمال وفكرة بتيجي على بالها لما تواجه تحدّي أو حاجة جديدة هي: أنا مش هاعرف، مش هقدر، صعب عليّ.
.
🟢 بينما عقلية النمو بيرحّب بالجديد، وبيشوف إنه فرصة للتعلّم والتطور. لما يتعرّض لتحدّي أو حاجة جديدة، عينه بتلمع، وأول حاجة تيجي في باله هي: أنا هحاول بإذن الله، وإن شاء الله أقدر، ولو غلطت إيه المشكلة؟ الأخطاء جزء أصيل من رحلة النجاح. شعاره: earn or learn.
.
🔴 العقلية الثابتة: نَفَسها قصير، سهل قوي تحبط وتستسلم، عايزة تضمن النتيجة قبل بذل المجهود، وأي شك في تحقيق النتيجة المطلوبة بيخلّيها أوتوماتيك تعزف عن المحاولة.
.
🟢 بينما عقلية النمو: نَفَسه طويل، ومش بيحبط أو يستسلم بسهولة مع أول إخفاق أو فشل. هو مؤمن بفكرة السعي أكتر من فكرة ضمان تحقق النتائج، ومؤمن بقانون «الجهود المهدورة»، وإن لازم أي نجاح أو تحقيق نتائج يكون طريقه محفوف ببعض الجهود المهدورة اللي ما فيش من وراها نتيجة مباشرة.
.
🔴 العقلية الثابتة: بتعتبر إن نجاح اللي حواليها أو منافسيها تهديد ليها أو هجوم غير مباشر عليها، وأي مواجهة ليها بقصور أو خطأ عندها فهي إهانة وهجوم عليها.
.
🟢 بينما عقلية النمو: شايف إن عادي كلنا ننجح، وإن مش لازم نجاحي يكون الأعلى أو الأكبر، وإن عادي يكون عندي قصور أو خطأ في شيء، وده لا يُعتبر ذمًّا أو إهانة ليا، وعادي إني أتعلم من غيري.
.
🔴 العقلية الثابتة: تفكيرها سلبي في معظم المواقف، ومش عايزة تتعلم، وشايفة إن لما الكون كله يتصلّح فأنا ساعتها أتصّلح.
.
🟢 بينما عقلية النمو: منفتح دائمًا على التعلّم، سواء علم خاص بشغله أو أمور حياتية، ودايمًا بيبدأ بنفسه وبيسأل: «دوري إيه؟»، مش بينتظر كل الظروف تتصلّح عشان يبدأ هو.
.
أخيرًا، في سؤال أصحاب كل عقلية مشهورين بيه قوي:
.
🔴 العقلية الثابتة: سؤالها دايمًا منصب على الماضي، وبيبدأ بـ«ليه»: ليه ما اتولدتش في بلد كويس؟ ليه اتظلمت في الموقف الفلاني؟ ليه يا رب خدت مني نعمة كذا أو كذا؟ بيسأل دايمًا بـ«ليه» عن أشياء في الماضي وما لهوش يد فيها.
.
🟢 بينما عقلية النمو: سؤالها دايمًا موجه للحاضر والمستقبل، وبيبدأ بـ«إزاي»: إزاي أعدّي الموقف ده؟ إزاي أتخطّى فقد فلان؟ إزاي أبدأ من جديد بعد الحادثة اللي خلتني مشلول؟ إزاي أعوّض درجة مادة كذا بعد الموقف اللي منعني أروح الامتحان في اليوم ده؟ إيه أفضل حاجة أعملها لنفسي في الوقت الحالي؟
.
🔲 مهم جدًا نفهم الكلام ده وندركه ويتحوّل لجزء من وعينا وإدراكنا ويتحوّل لتطبيق.
.
🔲 أنا شخصيًا حواليا ناس كتير من أصحاب العقلية الثابتة: في الشغل، والأصحاب، والأهل والعيلة. وكتير بيبقى نفسي آخد بإيديهم عشان مصلحتهم، ولكن للأسف بلاقي المقاومة العنيدة اللي حكيت عنها فوق.
.
⚫ وأقولكم سرًّا: أنا في فترة مش قليلة من حياتي كنت من أصحاب العقلية الثابتة. الموضوع أخد مني وقت كبير عشان أقدر أغير عقليتي؛ الموضوع مش بيتم في يوم وليلة، لكنه بياخد سنين. وعشان كده البوست ده سعي مني في تغيير غيري للأفضل.
.
🤲 أسأل الله أن ينفع به غيري وأن يجعله خالصًا لوجهه.
في النهاية بقى، عايزك تقولي:
❓هل عندك الشجاعة إنك تواجه نفسك وتقول: أنا من أصحاب العقلية الثابتة؟
ولو انت مش منهم، هل تعرف حد من أصحاب العقلية الثابتة؟
.
✅ لو تعرف حد، شير البوست ده معاه؛ لعله يستفيد.
.
تابعونا في "العيادة الإدارية" لمزيد من التحليلات التي تضع المشكلات الإدارية تحت المجهر.
لو شايف أن المقالة مفيدة أو ممكن تنفع حد غيرك اعمل شير.
لو بتدور على حد يرشدك في خطواتك أو يساعدك في تطوير شغلك، تقدر توصلي وتحجز مقابلة معايا ،
تعليقات
إرسال تعليق
شكراً لتفاعلك مع العيادة الإدارية .. نسعد بتعليقكم