عايز عربية و لا سواق؟

 في فرق كبير بين العربية و السواق

.
العربية: كل اللي مطلوب منها اني ادوس بنزين تسرع ادوس فرامل تقف، احود يمين تروح يمين، احود شمال تروح شمال

لكن السواق بقى: بتديله هدف و هو عليه انه يراجع على العربية و يطمن انها جاهزة للمشوار و يحمل العربية بالشحنة و يأمنها كمان، و يحدد احسن طريق اللي يوصل للهدف او الوجهة و يبتدي يتحرك و يظبط السرعة بحيث انها توصله في الوقت المطلوب و في نفس الوقت توصله بسلام بدون حوادث او مخالفات، و يتعامل مع اي طارئ او عائق يظهر، سواء عطل في العربية او قطع في الطريق او مطب جديد، و يوصل الشحنة بسلام للشخص الصحيح و يقوم باللازم سواء استلام فلوس او توقيع على ورق او غيره و بعدها يرجع تاني بسرعة و سلامة و ينتظر هدف جديد
.
لما تيجي توظف موظف جديد، لازم تبقى عارف انت عايزه عربية ولا سواق، مخ و لا عضلات، لان مش كل الناس عندها عضلات و لا كل الناس عندها مخ، طبعاً الكلام هنا مجازي، لان معظم الاعمال دلوقتي ما بقتش محتاجة عضلات بعناها الحرفي، و لكن اللي اقصده انت عايز منفذ و لا مخطط، واحد بيعرف ينفذ المطلوب منه و لا واحد بيعرف يفكر و يخطط و يلاقي حلول للمشاكل، النوع الاول بيكون موجود منه كتير و النوع التاني بيكون موجود في الحياة بشكل عام بشكل اقل.
.
طبعاً معظم ان لم يكن كل الوظايف بتكون عايزة خليط من الاتنين، مافيش ابداً حد مطلوب منه مهارات تفكير فقط بدون تنفيذ و العكس صحيح، و لكن اللي مطلوب انك تبقى عارف الوظيفة دي محتاجة مخ اكتر و لا عضلات اكتر
.
لو جبت سمكة و طلبت منها تطير هاتبقى حكمت عليها بالفشل و لو جبت عصفور و طلبت منه يعوم برضو هايفشل، خليك شاطر و عين العصفور في الوظيفة اللي محتاجة طيران و السمكة في الوظيفة اللي محتاجة سباحة
.
#فن_اختيار_الموظفين
#العيادة_الإدارية
.

لو بتدور على حد يرشدك في خطواتك أو يساعدك في تطوير شغلك، تقدر توصلي وتحجز مقابلة معايا من هنا