الذكاء الاجتماعي

 عارف ايه اكتر الصفات اللي ممكن تكون سبب في فشلك في البيزنس والعلاقات الاجتماعية؟

واحدة من اكتر الصفات اللي تخسرك البشر عموماً اياً كان مكانتهم، شركاء، عملاء، موردين، موظفين، اصدقاء، جيران، اخوات، ازواج

هي انك عايز دايماً تطلع منتصر

.

(1) بتكتب عقد مع شريكك في الشركة اللي هاتأسسها، و قعدت تظبط الدنيا بحيث انك تطلع انت كسبان اكتر، او مميز نفسك اكتر، او مجنب نفسك الخساير، او مشيله هو في الحسارة اكتر

.

(2) حصلت مشكلة مع عميل، والامر يحتمل وجهات نظر، بل ازيدك من الشعر بيت، العميل مش على حق، و انت قررت بقى تقيم عليه الحجة وتطلعه من عندك قفاه يقمر عيش

.

(3) واحد من فريق عملك، اتصرف تصرف ما، و باين انه عمله عن قلة خبرة، او حتى عن قلة تركيز، فانت بقى مصر على انك تقيم عليه الحجة، او انك تنهره بطريقة تسببله اذى نفسي

.

(4) دخلتي مناقشة او جدال مع زوجك و هو غلطان، وانت بقى قررتي تقيمي عليه الحجة وتحاصريه لحد ما يعترف بغلطه

.

(5) اختلفت انت و صاحبك في امر ما وشايف ان هو صح و لكن انت مش قابل تقر او تعترف ان معاه حق، فقومت مهاجم شخصه، او فكرته بحاجة تانية غلط وقع فيها، عشان تنتصر لصورتك و ما تطلعش من الموقف ده متنازل او غلطان

.

صدقني دي اسوأ صفة، كفيلة انها تدمر اي علاقة انسانية

.

طيب ايه الحل؟

الحل انك دايماً و انت في اي نقاش او جدال تفكر نفسك بأهمية علاقتك بالشخص ده، و اسأل نفسك لو اتحط فوزي في الموقف ده في كفة و استمرار علاقتي الطيبة بالشخص ده في كفة، هاختار ايه؟

.هتلاقي ان فوزك في الموقف ده وزنه صغير قوي جنب استمرار علاقتك الطيبة بالشخص ده

.

مش بنقول اننا نبقى ناس مش بنقف على الاخطاء او نحاسب عليها، و لكن فرق بين الاخطاء اللي تستحق الوقوف عندها و الهفوات اللي تتفوت، و لو لقيته خطأ يستحق الوقوف عنده، خلي تركيزك كله على المستقبل مش الماضي، يعني بدل ما تقوله عملت كده ليه، قوله يا ريت المرة الجاية ما تعملش كده عشان ده بيضايقني او بيخسر الشغل

.

اخيراً: **كسب القلوب اولى من كسب المواقف**

.

تابعونا في "العيادة الإدارية" لمزيد من التحليلات التي تضع المشكلات الإدارية تحت المجهر.

لو شايف أن المقالة مفيدة أو ممكن تنفع حد غيرك اعمل شير.

لو بتدور على حد يرشدك في خطواتك أو يساعدك في تطوير شغلك، تقدر توصلي وتحجز مقابلة معايا ،  

من هنا