إيه هو ترتيب الاحتياجات عند أي انسان؟

 

أنا جعان، أنا محتاج آكل.

أنا خايف، أنا محتاج أحس بالأمن.

أنا حاسس بالوحدة، ومحتاج حد يونسني.

مش لاقي اهتمام، محتاج أحس بالاهتمام والتقدير.

كل دي حاجات كلنا بنحتاجها، وبتأثر في استقرار نفسيتنا. ولكن موضوع الاحتياجات ده مش كله زي بعضه، يعني في احتياجات تلبيتها يجب أن يسبق تلبية احتياجات تانية.

في عالم نفس اسمه ماسلو، عمل هرم رتب فيه الاحتياجات دي من حيث ترتيب أولوية تلبيتها.

ماسلو قال إن:

• الاحتياجات الفسيولوجية زي (الأكل – الشرب – النوم – التنفس – الجنس – الإخراج) بتيجي الأول.

• وبعدها تيجي احتياجات الأمان (السلامة الجسدية – الأمن الوظيفي – أمن الممتلكات).

• وبعدها تيجي الاحتياجات الاجتماعية (إن يكون عندك أصحاب وأهل، يكون عندك حد بتحبه ويحبك).

• وبعدها تيجي الحاجة لتقدير الذات (أن تحظى باحترام وتقدير المجتمع – أن تكون صاحب مكانة اجتماعية مرموقة – أن تشعر بثقتك في نفسك وثقة الآخرين فيك – الشعور بالإنجاز).

• وآخر احتياج هو الاحتياج إلى تحقيق الذات (إنك تعمل اللي تحس بيه إنك بتمارس دورك اللي ربنا خلقك عشانه في الحياة – إنك تحس إنك جايب آخر قدراتك وإمكاناتك – لو عندك قدرات رياضية إنك تدخل بطولات وتفوز فيها "تبقى زي محمد صلاح مثلاً" – لو عندك قدرات علمية فتفضل تعمل في أبحاث علمية لحد ما تتوصل لاكتشاف معين يفيد البشرية كلها زي دكتور زويل – من الآخر إنك توصل لمرحلة إنك تبقى مميز، مش شخص عادي – إنك تكون بتعمل حاجة مختلفة تحس فيها بقيمتك وذاتك).

طيب ماسلو بيقول إيه بقى؟ بيقول إن الاحتياجات دي المفروض إنها تتلبى من تحت لفوق (في الهرم). يعني إيه من تحت لفوق؟ يعني من الأول للآخر. يعني لازم الأول احتياجات الإنسان الفسيولوجية تتحقق عشان يقدر يحقق اللي بعدها واللي بعدها واللي بعدها.

يعني عشان نطلب من حد إنه يحقق ذاته لازم الأول يلبي احتياج تقدير الذات. وعشان يلبي احتياج تقدير الذات لازم يلبي احتياجاته الاجتماعية. وعشان يلبي احتياجاته الاجتماعية لازم يتحقق له الأمان. وعشان يتحقق له الأمان لازم تكون احتياجاته الفسيولوجية متلبية.

طيب الكلام ده لازمته إيه؟ الكلام ده مهم لأي حد محتاج يأثر في الناس، لأنه عشان يأثر في الناس لازم يبقى فاهم ترتيب احتياجاتهم. مين بقى بيحتاج يأثر في الناس؟ القادة والمديرين، وحكام الدول، والمتخصصين في الموارد البشرية، والناس بتوع الإعلام، والمتخصصين في التسويق والترويج والإعلان.

يعني مثلاً عشان نعرف نعلن عن أي منتج ونعمله الترويج المناسب ليه لازم نبقى عارفين هو بيلبي أي مرحلة من مراحل الاحتياجات الإنسانية في هرم ماسلو، وبالتالي مين هي الفئة المستهدفة بالنوع ده من المنتجات، وكمان إيه هي أفضل طريقة للوصول للفئة دي والتأثير عليهم.

يعني مثلاً: ليه إعلانات كوكاكولا وبيبسي (إحنا بنضرب بيهم مثل فقط، ولكن هما مقاطَعة زي ما هما) كلها بتكلمنا عن عواطف وقيم أكتر ما بتكلمنا عن جودة المنتج نفسه رغم إنه مشروب يدخل في الاحتياجات الفسيولوجية؟

زي: (كوكاكولا.. اشرب.. تفرح) – (كوكاكولا.. لو ده جنان اتجنن) – (كوكاكولا.. حملة اكتب اسمك على الـcan).

عشان هي بتقدم منتج غير أساسي، وعشان هي قديمة جداً، والطعم والجودة بقى أمر مفروغ منه من زمان. فمش معقول تيجي سنة 2025 وتقولك: اشرب بيبسي اللي بيتكون من كذا وطعمه كذا.

هي بتحاول تربط المشروب بقيمة أو شعور عاطفي، عشان إنت لما تحتاج تحس بالشعور ده، تجيب المنتج بتاعهم. وما أكثر الاحتياجات العاطفية. هنا هي خدت منتجها من طبقة الاحتياجات الأساسية وراحت بيه لطبقة الاحتياجات النفسية.

مثال تاني: ليه بعض الشركات رغم إن مرتباتهم مش بتكون أعلى مرتبات في السوق، لكن بنلاقي إن معدل دوران العمالة فيها مش عالي؟ وفي انتماء وتمسك بالوظيفة من معظم الموظفين فيها. وشركات تانية بتدي مرتبات عالية ولكن معدل دوران العمالة فيها عالي؟

الإجابة اللي بتسمعها من الموظف دايماً: "بيئة العمل".

وفي الواقع هما معاهم حق، ولكن الموضوع بيجي إزاي؟

بيجي من قيادة عندها ذكاء عاطفي واجتماعي عالي، وكذلك إدارة موارد بشرية بتهتم بالجوانب النفسية للموظف.

يعني: في نظام واضح ومعلن، بيكفل لكل واحد حقه، وإن شغل كل واحد ينسب ليه، وإن يبقى في تقدير لكونه إنسان مش مجرد آلة، وكمان يكون في تقدير لشغله عن طريق تقييمات، تكريمات، وتجمعات اجتماعية.

وهكذا، فهنا رغم إن الراتب مش أعلى راتب في السوق، بس في بعض الجوانب النفسية اللي بتعوض وتخلي الموظف يفكر كتير قبل ما ينقل لشركة تانية.

.

في النهاية، فهمك واستيعابك لهرم ماسلو، مهم ليك جداً لو كنت مسوق، او مسئول موارد بشرية، أو قائد مؤسسة، او مدير فريق، لام لازم تحط ترتيب الاحتياجات ده في اعتبارك وانت بتخطط وبتاخد قرارات

.

وقبل ما امشي، عايز اسألك، يا ترى لو انت صاحب قرار في شركة، و معاك مبلغ ما مخصص للموارد البشرية، والمبلغ اما انك تزود بيه مرتبات فريق العمل بنسبة 5% او انك تعملهم بيه تأمين صحي مع شركة خاصة؟ يا ترى هاتختار ايه؟ منتظر اجابتك؟

✅ ولو تعرف حد، شير المقالة دي معاه؛ لعله يستفيد.

.

تابعونا في "العيادة الإدارية" لمزيد من التحليلات التي تضع المشكلات الإدارية تحت المجهر.

لو شايف أن المقالة مفيدة أو ممكن تنفع حد غيرك اعمل شير.

.

لو بتدور على حد يرشدك في خطواتك أو يساعدك في تطوير شغلك، تقدر توصلي وتحجز مقابلة معايا ،  

من هنا