Growth hacking حيل النمو
مؤخراً انتشر مصطلح growth hacking، و عامل لغبطة لبعض الناس، لأن في ناس اول ما بتسمع hacking بيجي في دماغها على طول اختراق و تجسس و شاشات سودا و text اخضر 😄، ويمكن سبب ده انهم بيترجموا كلمة hacking على انها قرصنة، و بالتالي بيترجموا growth hacking بقرصنة النمو، و الترجمة دي تعتبر ترجمة حرفية مخلة بصراحة و هي اللي بتسبب اللغبطة دي.
.
كلمة hack او hacking مش في كل المواضع معناها قرصنة، لان قرصنة معناها سلبي، و بيوحي بانك بتاخد حاجة مش من حقك، بينما الترجمة الانسب هنا هي حيل النمو او النمو بتحايل، او بمكر و دهاء.
.
وللتبسيط للناس اللي مش فاهمة، الgrowth hacking عبارة عن انك بتشغل دماغك في جميع مراحل رحلة العميل بتاعك من ساعة ما بيسمع عنك ( awareness ) لحد ما بيشتري و يرجع يكرر الشراء، الرحلة دي بنقسمها لمراحل حسب درجة اقتراب العميل من اتخاذ قرار شراء المنتج او الخدمة، يعني مرحلة السماع عن الشركة او المعرفة بها، وبعدين الاهتمام، و بعدين الرغبة و بعدين قرار الشراء و بعدين الاعجاب بالمنتج او الخدمة و من ثم تكرار الشراء او ترشيح المنتج او الخدمة لصديق آخر، طيب فين بقى الgrowth hacking؟ انا اقولك.
.
انت عايز تزود مبيعاتك يعني عايز يحصلك نمو سواء في حجم المبيعات او قاعدة العملاء و بالتالي حجم المبيعات، طيب حضرتك وصلت مع العميل انه خلاص عرفك و اهتم بيك و عايز يشتري وكمان اشترى وكمان عجبه منتجك، ازاي بقى تخلي كل عميل يجيب عميل تاني ( طبعاً هنا القاعدة الاساسية هي ان منتجك الجيد و خدمتك المميزة للعميل هاتخليه يعمل كده لوحده، و ده صح و ساعتها انت هاتنمو و لكن بمعدلات عادية، لكن لو عايز تعمل معدلات نمو فيروسية - يعني طفرات - تعمل ايه؟)
.
تيجي هنا بقى افكار الgrowth hacking، يعني مثلاً ممكن نقول ان كل عميل يرشح عميل تاني، لو العميل التاني ده اشترى، العميل الاولاني ياخد خصم او هدية، او اللي يرشح ١٠ عملاء و يشتروا ياخد اشتراك لمدة شهر مجاناً، فساعتها تبقى حولت معظم عملاءك لمسوقين ليك، و الموضوع هنا بقىdynamic و فيروسي، العميل بيجيب ١٠ و ال١٠ بيجيبوا ١٠٠ و ال١٠٠ بيجيبوا ١٠٠٠ و هكذا ، تبقى عرفت تبتكر حيلة تسويقية لنمو قاعدة عملاءك و بالتالي حجم مبيعاتك، بس كده يا سيدي، هي دي قصة الgrowth hacking.
.
قولي بقى، دلوقتي تقدر تستفيد من الgrowth hacking في البيزنس بتاعك ازاي؟
.
منتظر اشوف اجاباتكم و تعليقاتكم
.
#العيادة_الإدارية
تعليقات
إرسال تعليق
شكراً لتفاعلك مع العيادة الإدارية .. نسعد بتعليقكم